Karlmaður á þrítugsaldri var í síðustu viku dæmdur í þriggja og hálfs árs fangelsi fyrir stórfelld fíkniefnalagabrot í Héraðsdómi Reykjaness. Maðurinn var með 7 og hálfan lítra af vökva sem innihélt amfetamínbasa í bílskúrnum sínum. 

Í dómnum kemur fram að maðurinn hafi, auk amfetamínsbasans, verið með í fórum sínum 940 millilítra af stungulyfinu Mesterolon, 510 millilítra af stungulyfinu Nandrolon, 1540 millilítra af stungulyfinu Testosteron, 2.180 millilítra af stungulyfinu Trenbolon og 980 millilítra af Sustanon. Amfetamínbasinn og hin efnin fundust við leit lögreglu á heimili ákærða og í bílskúr sem hann leigði.

Lögreglan krafðist upptöku á efnunum og búnaði sem hann var með. Um er að ræða þrjár loftsíur, ræktunartjald, tvær loftdælur, þrjá tímarofa, PH próf, mælikönnu, lampa, stálbrúsa, 41 glerflöskur úr IKEA, loftæmingavél, poka og Ísóprópýl alkahól brúsa.

Maðurinn kom fyrir dóm og játaði sök sína skýlaust. Hann lýsti fyrir dómi iðrun og vilja til að brjóta ekki af sér afur.Maðurinn segist hafa reynt að snúa við blaðinu og lagði fram gögn um að hann hafi verið í vinnu. Óhjákvæmilegt var þó að horfa framhjá magni og hættueiginleika þeirra efna sem maðurinn var með. Maðurinn hafði ekki verið dæmdur hér á landi en í dómnum kemur fram að það liggi ekki fyrir hvort það eigi líka við annars staðar. Miðað var því við að þetta væri hans fyrsta brot.

Í lok dómsins kemur fram að maðurinn hafi að lokum verið dæmdur í fangelsi í þrjú og hálft ár. Auk þess þarf hann að greiða samtals rúmlega fjórar milljónir í þóknun til lögmanna og í annan sakarkosnað.