Um klukkan þrjú í nótt voru tveir menn handteknir í höfuðborginni grunaðir um nytjastuld á ökutæki. Ökumaðurinn er einnig grunaður um að hafa verið undir áhrifum fíkniefna. Þetta var í annað skipti á tveimur sólarhringum sem viðkomandi var handtekinn grunaður um nytjastuld á ökutæki.

Einn ökumaður var kærður fyrir of hraðan akstur en bifreið hans mældist á 138 km/klst í Ártúnsbrekku en þar er leyfður hámarkshraði 80 km/klst.

Skömmu fyrir miðnætti brotnaði nefhjól á eins hreyfils flugvél við lendingu á Reykjavíkurflugvelli, engin slys urðu á fólki.

Um klukkan 22 var tilkynnt um hóp ungmenna með bensínsprengjur við skóla í Hafnarfirði. Hópurinn tvístraðist þegar lögreglan kom á vettvang en glerbrot og önnur ummerki eftir hópinn voru sýnileg á vettvangi.

Um miðnætti var ökumaður handtekinn í Hlíðahverfi en hann er grunaður um að hafa verið undir áhrifum fíkniefna. Hann var með ólöglegan hníf á sér sem hald var lagt á.