Í gær var haldinn foreldrafundur í Fossvogsskóla vegna heilsuspillandi myglu sem hefur greinst í skólanum í nokkur ár. Skúli Helgason, formaður skóla- og frístundaráðs Reykjavíkurborgar, og Helgi Grímsson, sviðsstjóri skóla- og frístundasviðs, mættu á fundinn. Þeir sögðu að nýtt framkvæmdateymi hafi verið skipað til að fara yfir stöðuna í skólanum.

Morgunblaðið skýrir frá þessu. Fram kemur að Skúli hafi sagt að málið hafi tekið langan tíma og margt hefði mátt fara betur. Þegar unnið var við skólann fyrir tveimur árum vegna myglu var skólastarfið flutt í höfuðstöðvar KSÍ í Laugardal. Helgi sagði að það væri ekki mögulegt núna. Hann sagði að ekki liggi fyrir hvort rýma þurfi hluta skólans eða hann allan, framkvæmdateymið muni skoða það.

Morgunblaðið segir að á fundinum í gær hafi foreldrar lýst yfir óánægju sinni með ræður og svör Skúla og Helga og hafi spurt hvort börnin ættu að vera áfram í menguðu húsnæði á meðan enn ein skýrsla væri gerð um málið. Áskorun með nöfnum 250 foreldra var afhentur þeim Skúla og Helga á fundinum. Í henni er lýst þungum áhyggjum af stöðu skólans og ótta við áhrif myglunnar á nemendur. „Ástand skólans skerðir lífsgæði barna og starfsfólks og stofnar heilsu þeirra í hættu. Við minnum á að myglumengun getur haft varanleg og skaðleg áhrif á heilsu,“ segir meðal annars í áskoruninni.

Eftir fundinn sendi Ingibjörg Ýr Pálmadóttir, skólastjóri Fossvogsskóla, síðan tölvupóst til foreldra þar sem hún tilkynnti að kennslu verði nú hætt í húsnæði skólans og í dag verði kennt utanhúss, á svæði Víkings, á föstudaginn er starfsdagur og því engin kennsla. Kennsla hefst svo væntanlega í nýju húsnæði á mánudaginn en enn liggur ekki fyrir hvar.