Um klukkan 3 í nótt riðu tveir stórir skjálftar yfir á Reykjanesskaga. Sá fyrri átti upptök sín 1,3 km SV af Keili klukkan 02.53 og mældist hann 4,3. Sá seinni átti upptök í Fagradalsfjalli klukkan 03.05 og mældist 4,6 að stærð.

Í tilkynningu frá Veðurstofu Íslands segir að báðir skjálftarnir hafi fundist vel á Suðvesturhorninu og sá síðari hafi fundist austur á Hellu og í Vestmannaeyjum.

Virknin hefur verið nokkuð kaflaskipt í nótt. Frá klukkan 22 og fram yfir miðnætti mældust nokkrir skjálftar yfir 3,0. Um klukkan hálf þrjú jókst virknin síðan á nýjan leik.