Forsvarsmenn byggingafyrirtækisins VKC ehf., sem eru tveir karlmenn, voru í Héraðsdómi Reykjavíkur í dag, dæmdir til að greiða yfirdráttarskuld við Landsbankann upp á tæpar 20 milljónir króna, auk dráttarvaxta yfir nokkurra mánaða tímabil.
VKC var í viðskiptum við Landsbankann og var með veltureikning. Reikningnum var lokað 31. desember vegna vanskila. Fjárhæðin var upp á tæpar 20 milljónir króna.
VKC var tekið til gjaldþrotaskipta 20. mars 2019 en Landsbankinn stefndi forsvarsmönnum fyrirtækisins til að greiða yfirdráttinn með dráttarvöxtum. Málið var höfðað 21. maí 2019.
Forsvarsmenn VKC kröfðust frávísunar málsins á grundvelli þess að stefnan væri vanreifuð þar sem Landsbankinn hefði ekki gert grein fyrir hvernig verðmætum sem VKC hafði veðsett hefði verið ráðstafað. Var þar meðal annars um að ræða tvær loftpressur af gerðinni Ingersoll Rand og Atlas Copro, bíla af gerðinni Mercedes Benz, Toyota Land Cruiser, Renault Kangoo; borhamra, Catepillar skurðgröfu og margt fleira.
Dómurinn taldi óumdeilt að mennirnir hefðu gengið í sjálfskuldarábyrgð fyrir yfirdrættinum. Sjálfskuldarábyrgðin væri á engan hátt háð því að bankinn gengi fyrst að veðkröfunum. Bankanum væri í sjálfsvald sett hvernig hann innheimti skuldina, þ.e. hvort hann freistaði þess að leita fullnustu í hinu veðsetta lausafé eða hæfist strax handa um innheimtu á hendur mönnunum.
Voru mennirnir því dæmdir til að greiða yfirdráttarskuldina með vöxtum. Auk þess þurfa þeir að greiða málskostnað upp á 7.00.000 krónur.
