„Það gefur leið að það hefur áhrif á rannsóknina því við óskuðum eftir gæsluvarðhaldi yfir þremur,“ segir Margeir Sveinsson, aðstoðaryfirlögregþjónn hjá miðlægri rannsóknardeild Lögreglunnar á höfuðborgarsvæðinu, í samtali við DV, en spurt var hvort það hefði slæm áhrif á rannsókn á líkamsárásum í Borgarholtsskóla í síðustu viku að enginn er lengur í gæsluvarðhaldi vegna málsins.

Fréttablaðið skýrði frá því að Landsréttur hefði fellt úr gildi úrskurði héraðsdóms um gæsluvarðhald yfir 19 ára manni í þágu rannóknar málsins, og hefur sá maður nú verið látinn laus. Lögreglan fór fram á gæsluvarðhald yfir tveimur öðrum ungmennum en héraðsdómur hafnaði þeirri kröfu.

„Rannsókninni miðar þokkalega,“ segir Margeir en sagði að ekkert frekar væri meira um það að segja. Hann gat ekki svarað því hvort ákærur væru líklegar í málinu. „Það verður bara tekin afstaða til þess þegar rannsókn málsins er lokið og niðurstöður verða sendar til ákærusviðs.“

„Þetta er bara mat dómstóla og við hlítum því,“ sagði Margeir ennfremur um þá staðreynd að enginn er í gæsluvarðhaldi vegna rannsóknar málsins.

Að minnsta kosti sex ungmenni fóru á slysadeild eftir átökin í Borgarholtsskóla. Fólkið slasaðist þó ekki alvarlega en atburðurinn vakti mikinn óhug í samfélaginu. Ungur maður kom í skólann vopnaður hnífi og hafnarboltakylfu. Sérveit lögreglu koma á vettvang og þrjú ungmenni voru handtekin.

Ástæður átakanna eru óljósar og mismunandi ástæður hafa verið gefnar upp í fréttum og samfélagsmiðlum. Óvíst er hvenær rannsókn lögreglu á málinu lýkur.