Ísland tapaði gegn Sviss í fyrsta leik í milliriðli á HM í Egyptalandi, 18-20. Slakur sóknarleikur og hræðileg færanýting urðu Íslandi að falli í leiknum, sem var þó hnífjafn allan tímann. Sviss leiddi þó mestan hluta leiksins en staðan í hálfleik var 10:9 fyrir Sviss.

Ef það var ekki ljóst fyrir er það engum hulið sem sá þennan leik að íslenska landsliðið, sem er í uppbyggingarfasa, á enn mjög langt í land með að komast í allra fremstu röð.

Björgvin Páll Gústafsson markvörður var besti maður liðsins, hann stóð í markinu í um 2/3 hluta leiksins og varði 11 skot. Auk þess skoraði hann 2 af 18 mörkum liðsins.

Ólafur Guðmundsson var markhæstur með 4 mörk. Þess má geta að Ísland fékk tvö víti dæmd í leiknum og klúðruðust bæði auk fjölda dauðafæra, en Portner, markvörður svissneska liðsins, varði 14 skot.

Logi Geirsson, handboltasérfræðingur RÚV, sagði að þetta væri einn versti landsleikur sem hann hefði séð. „Gummi tapaði þessari skák,“ sagði Logi og taldi að landsliðsþjálfarinn hefði ekki haft neinar lausnir í leiknum.