FBI hefur handtekið Riley June Williams vegna aðkomu hennar að óeirðunum í Washingtonborg í þar síðustu viku. Líkt og DV greindi frá í fyrradag hefur FBI gefið út ákæru á hendur konunni fyrir óspektir á almannafæri, innbroti í lokaða byggingu og fyrir að trufla störf yfirvalda. Þá var handtökuskipun gefin út vegna tilkynninga um að konan hafi verið viðriðin fartölvuþjófnað af skrifstofu Nancy Pelosi, forseta fulltrúadeildar Bandaríkjaþings.
Konan er í handtökuskipuninni sögð hafa ætlað að senda tölvuna til rússneskra vina sinna sem ætluðu svo að selja hana til leyniþjónustunnar þar í landi.
Breska sjónvarpsstöðin ITV hafði raunar þegar vakið athygli á aðkomu hennar að óeirðunum, en á upptökum sem stöðin birti virtist konan skera sig úr fjöldanum. Var engu líkara en að konan vissi nákvæmlega hvert hún ætti að fara og stýrði fjöldanum upp tröppurnar og beint að skrifstofu Pelosi. Þá sást konan bera tösku á öxlinni út úr húsinu síðar.
Drew Hammill, starfsmannastjóri Nancy Pelosi, staðfesti síðar að fartölvu hefði verið stolið af skrifstofu Pelosi, en að hún hefði aðeins verið notuð til að sýna kynningar í fundarsal.
ABC greinir svo frá því, sem fyrr sagði, að konan hefði gefið sig fram við alríkislögregluna í Pennsylvaníu og verið handtekinn. Williams var í haldi lögreglu í nótt og mun koma fyrir dómara í dag þar sem hún mun þurfa að taka afstöðu til ákærunnar.