Þetta segir Anna Valdís Jónsdóttir, varaformaður og verkefnisstjóri Fjölskylduhjálpar Íslands á Suðurnesjum í samtali við Fréttablaðið í dag. Fyrir helgi fengu yfir 200 fjölskyldur á Suðurnesjum mataraðstoð en vísa þurfti um 50 fjölskyldum frá vegna þess að ekki var nóg til af mat.
„Manni finnst þetta bara orðið svo ljótur heimur. Það vantar alla samkennd í fólk og kærleika sem var hérna á árum áður. Þetta eru orðnir breyttir tímar,“ segir Anna. „Það voru 209 fjölskyldur og einstaklingar sem komu á fimmtudaginn og við urðum að vísa fólki frá. Allur maturinn var bara búinn í húsinu. Það hafa síðan komið nokkrar fjölskyldur hingað í dag sem við höfum þurft að vísa frá.“
Anna segir að staðan sé, vægast sagt, mjög slæm. „Þetta kostar allt mikla peninga og við erum ekki með neitt peningatré,“ segir Anna en Fjölskylduhjálp hefur ekki fengið neina fjárhagsaðstoð, þrátt fyrir fyrirspurnir. „Þetta er mjög slæmt. Við höfum ekki fengið neina aðstoð frá neinu sveitarfélaganna hérna. Það hlýtur að vera mikil hjálp að hafa okkur því skjólstæðingar okkar koma úr öllum sveitarfélögunum á Suðurnesjum. Það eru Vogar, Grindavík, Njarðvík, Garður, Reykjanesbær og Sandgerði. Þetta er allt fólk sem leitar hingað.“
Samkvæmt Önnu mun Fjölskylduhjálp reyna að standa fyrir annarri úthlutun í næsta mánuði en ekki er vitað hversu stórtæk sú úthlutun verður. Anna segir að Fjölskylduhjálp þurfi að safna pening svo hægt sé að gera meira. „Við þurfum að kaupa meirihlutann af matvörunum. Fólk heldur að þetta sé ríkisstyrkt og við fáum allt gefins en það er bara miskilningur,“ segir Anna. „Við erum alltaf að reyna afla meiri fjár til að geta gefið fleirum. Við vitum ekki nákvæmlega hvernig framhaldið verður og sérstaklega jólin. Við bara hræðumst þetta allt saman.“
