Talið er að krár og skemmtistaðir fái að opna aftur þann 28. september en Þórólfur Guðnason mun leggja það til í minnisblaði sem hann sendir heilbrigðisráðherra í dag, og inniheldur tillögur að breytingum á takmörkunum vegna samkomubanns. Þórólfur mun ekki leggja til hertar aðgerðir af nokkru tagi þrátt fyrir mörg smit undanfarið. Krár og skemmtistaðir verða opin til 23 eins og var fyrir lokun þeirra um daginn og settar verða fjöldatakmarkanir á gesti.

Þetta kom fram á upplýsingafundi Almannavarna í dag. Þórólfur var ekki sjálfur á fundinum þar sem hann fann fyrir kvefeinkennum í morgun og flutti Alda Möller upplýsingar dagsins. Þórólfur greindist neikvæður í sýntatöku en er samt í sóttkví í dag.

Víðir Reynisson yfirlögregluþjónn er nýkominn úr sóttkví og sagði hann að það væri erfitt að vera í sóttkví, hann væri búinn að prófa það sjálfur.

33 innanlandsmit greindust í gær en í fyrradag voru þau 57. Tæplega 3.000 sýni voru tekin. Hlutfall jákvæðra í skimun hefur lækkað undanfarið úr 5% niður í 2%. Alda sagði að sveiflur væru  miklar milli daga en svo virtist sem við værum að ná tökum á faraldrinum. Hins vegar gæti það tekið nokkuð langan tíma að fá hann til að ganga niður. Smitrakning gengur afar vel og 50 manna öflugt smitrakningarteymi er að störfum. Flestar ef ekki allar sýkingar eru raktar til hópsmita á nokkrum öldurhúsum fyrir skömmu.