„Það er ánægjulegt að sjá þessa fækkun en tölurnar sveiflast milli daga og við skulum sjá hvað gerist,“ sagði Þórólfur Guðnason sóttvarnalæknir á COVID-upplýsingafundi dagsins, og vísaði hann þar til þess að fjöldi smitaðra var 30 síðasta sólarhring en hafði verið 78 eftir föstudaginn. Sagði Þórólfur síðar á fundinum að vísbendingar væru um að það væri að takast að ná böndum á þriðju bylgju faraldursins.
Af þeim 30 sem greindust í gær voru 15 í sóttkví. Stór hluti smitaðra tengist krám og öldurhúsum sem hafa verið í fréttum undanfarið vegna smita, meðal annars Brew Dog og Irish Man.
Mikill fjöldi sjúklingasýna var tekinn í gær eða um 1.100. Af þeim reyndust 3% jákvæð.
Vinna smitrakningarteyma gengur mjög vel og hefur verið fjölgað í teymunum.
Þórólfur sagði ekki ástæðu til að herða samkomutakmarkanir að svo stöddu. Tilmælum er beint til fyrirtækja og stofnana um að afmarka rými á vinnustöðum og bjóða sem flestum upp á fjarvinnu. Kom fram á fundinum að einstaklingar, fyrirtæki og stofnanir hafi tekið vel við sér hvað varðar sóttvarnir og væri það ánægjulegt.