Upp úr sauð á Austurvelli þann 11. mars árið 2019 þegar töluverður hópur fólks safnaðist saman til að mótmæla brottflutningi hælisleitenda frá landinu. Lögregla var sökuð um að beita óþarfa hörku í aðgerðunum, nokkuð sem lögreglumenn neituðu, en hluti mómælenda freistuðu þess að reisa tjaldbúðir á Austurvelli.

Tuttugu og sjö ára gömul kona hefur verið ákærð fyrir ofbeldi gegn lögreglumönnum í mótmælunum. Ákæra var gefin út gegn henni þann 18. júní í sumar en þingfesting málsins verður þann 1. október næstkomandi fyrir Héraðsdómi Reykjavíkur.

Er DV hafði samband við konuna stóð hún í þeirri trú að þessi hluti ákæru gegn henni hefði verið felldur niður. Hún hafi farið í yfirheyrslu vegna málsins hjá saksóknara fyrir um ári og hafi alltaf neitað sök. Taldi hún að eftir stæði ákæra um að hafa óhlýðnast fyrirmælum lögreglu.

„Lögreglumennirnir réðust að okkur með piparúða og kylfum. Ég hélt að búið að væri að fella þetta niður. Ég var búin að fara í yfirheyrslu hjá saksóknara út af þessu og hef alltaf neitað sök. Ég kannast ekkert við að hafa sparkað í lögreglumann en það var ráðist mjög harkalega að okkur, við vorum dregin, okkur var hrint og sum okkar voru lamin.“

Segir hún að mótsagnir séu í framburði lögreglumanna um atvikið þar sem annar segir að hún hafi setið er hún sparkaði í lögreglumann en hinn að hún hafi staðið upp, gengið að lögreglumanni og sparkað í hann.

Í ákæru segir að konan sé ákærð fyrir að hafa sparkað þrisvar í lögreglumann á Austurvelli þann 11. mars 2019, er hann var þar við skyldustörf, með þeim afleiðingum að hann haf fundið til eymsla.

Er þess krafist að konan verði dæmd til refsingar og greiðslu alls sakarkostnaðar.