Fréttablaðið skýrir frá þessu í dag.
„Þetta eru úthugsuð svik og við sjáum dæmi þess að undirbúningur þeirra hefur staðið yfir í langan tíma,“
hefur blaðið eftir Hermanni Snorrasyni, sérfræðingi hjá Landsbankanum.
Svikahrapparnir setja upp mjög sannfærandi síður á samfélagsmiðlum þar sem fjölskyldumyndir og aðrar upplýsingar eru. Þeir grafa einnig upp ýmsar upplýsingar um fórnarlömbin og reyna til dæmis að notfæra sér sára reynslu þeirra, til dæmis makamissi eða skilnað.
Hjá Landsbankanum var byrjað að skilgreina ástarsvik sérstaklega árið 2017 og síðan þá hafa 48 slík mál gegn viðskiptavinum bankans verið skráð.
„Fyrstu átta mánuði ársins 2020 eru tilvikin orðin fleiri en allt árið 2019. Þá sjáum við líka að fleiri konur eru að verða fyrir barðinu á slíkum svikum en áður voru karlar á sextugs- og sjötugsaldri í miklum meirihluta,“
sagði Hermann og bætti við að reikna megi með að fórnarlömbin séu mun fleiri.
„Það sem einkennir þessi svik er sú gríðarlega skömm sem fórnarlömbin upplifa yfir því að hafa verið blekkt með þessum hætti. Okkur grunar því að tilvikin séu mun fleiri en fólk veigri sér við að tilkynna þau,“
sagði hann einnig og bætti við að tjón viðskiptavina Landsbankans hlaupi á tugum milljóna og því sé mikilvægt að viðskiptavinir séu meðvitaðir um hættuna.
„Þessi svik fylgja oft svipuðum handritum og því vonumst við til að geta snúið þessari þróun við með upplýsingum og fræðslu.“
