Víðir Reynisson, yfirlögregluþjónn biðlar til þeirra sem voru á barnum Irishman Pub, síðastliðið föstudagskvöld, á milli 16 og 23 að fara í skimun, sé það ekki nú þegar búið að því. Þetta kom fram í útvarpsþættinum Reykjavík Síðdegis sem er á dagskrá Bylgjunnar.
„Við erum að fara að senda beiðni frá okkur til þeirra sem voru á Irishman Pub á föstudagskvöldið og gerum það í samvinnu við eigendurna. Á morgun verður hægt að skrá sig í gegnum Heilsuveru í sýnatöku og við erum að hvetja þá sem voru þar síðasta föstudag milli kl. 16 og 23 og hafa ekki verið í sýnatöku eða samskiptum við okkur vegna sóttkvíar eða annað slíkt að skrá sig í sýnatöku. Þetta verður valkostur sem verður í boði,“
Arnar Gíslason, einn umsjónarmaður Irishman Pub var einnig í viðtali við Reykjavík Síðdegis, þar sagði hann að meintur smitberi hefði líklega einnig farið í nokkrar matvöruverslanir, bensínstöðvar og aðra staði. Hann lýsti því furðu sinni á því að sérstök áhersla væri lögð á sinn stað.