„Ég hef ekki heyrt í þeim og það er slökkt á símunum þeirra. Ég heyrði ekki í þeim í gær og hef ekki heyrt í þeim í dag,“ segir Magnús Davíð Norðdal, lögmaður egypsku fjölskyldunnar, sem flytja átti nauðungarflutningi frá landinu í morgun til Egyptalands, með viðkomu í Amsterdam. Ekki tókst að flytja fólkið úr landi í morgun þar sem þau fundust ekki.
„Þetta breytir engu um lögformlegar leiðir í málinu. Þær voru tæmdar í gær. En málið í heild sinni fer fyrir dómstóla og það verður látið reyna á það þar. Krafist verður ógildingar á þeim úrskurðum kærunefndar útlendingarmála sem þegar hafa verið kveðnir upp og þeirra sem hún á eftir að kveða upp. Kærunefnd á þegar eftir að svara tveimur endurupptökubeiðnum sem eru á borði nefndarinnar. Það er bara sjálfstætt, sú staða að það náist ekki í þau núna og þessi væntanlegi málarekstur eru ótengd mál.“
Magnús hefur enga hugmynd um hvar fjölskyldan er niðurkomin og hvaða aðilar kunna að hafa skotið yfir þau skjólshúsi. „Ég vona bara að þau séu örugg. Sama hvar fjölskyldan er niðurkomin þá vona ég það,“ segir Magnús.
