Þórólfur Guðnason sóttvarnalæknir sagði á upplýsingafundi dagsins að nýtt minnisblað hans til heilbrigðisráðherra sé í vinnslu. Núverandi samkomutakmarkanir gilda til 13. ágúst. Þórólfur segir að til greina komi að taka upp eins metra reglu í stað tveggja metra reglu í skólum og við fleiri aðstæður þar sem erfitt er um vik með 2ja metra reglu. Eins metra fjarlægð minnkar hættu á smiti fimmfalt en síðan minnkar hættan tvöfalt við hvern metra í viðbót.
Einnig kemur til greina að leyfa íþróttir með snertingu aftur þann 13. ágúst en ef það verður samþykkt getur til dæmis Íslandsmótið í knattspyrnu hafist aftur.
Tveir greindust smitaðir í gær. Voru bæði smitin greind í Vestmannaeyjum en þangað beindi Íslensk erfðagreining sinni skimunarvinnu í gær. Bæði smitin eru úr hópsýkingu sem greind var í Vestmannaeyjum fyrir skömmu og hefur dreift sér víða.
Sagði Þórólfur að fá tilfelli síðustu daga væru vonandi vísbending um að verið sé að ná tökum á þessari hópsýkingu.
Þrír liggja nú á Landspítalanum með COVID-19. Í gær var tvítugur einstaklingur lagður þangað inn.
Íslensk erfðagreining hefur skimað 4.800 manns frá því í lok júlí. Ellefu hafa greinst smitaðir og eru þeir allir með sömu undirgerð veirunnar sem rakin er til einnar hópsýkingar.
Á landamærunum voru 2.900 skimaðir í gær og hjá sumum farþegum var um að ræða sýnatöku númer 2. Einn greindist með virkt smit og einn er í bið.