„Án þess að vilja hljóma dramatískur þá hef ég sjaldan verið jafn hræddur um líf mitt eins og í dag. Ég var að keyra heim að norðan þegar ég varð að keyra útaf til að fá ekki stóran jeppa framan á mig.“
Svona hefst Facebook-færsla Sigurðar nokkurs Svavarssonar, sem hann birti í gærkvöldi og hefur vakið gríðarlega athygli. Í færslu Sigurðar er bréf til bílstjóra á jeppa sem hann mætti þegar hann var ásamt börnunum sínum á ferð í Borgarfirði. Sigurður segir að umræddur bílstjóri hafi ógnað lífi sínu og barnanna sem eru tveggja og fjögurra ára gömul. Jeppinn hafi tekið framúr fjórum bílum í blindbeygju. Það hafi orðið til þess að Sigurður hafi keyrt útaf veginum.
„Ég vona að aðilinn sem ég mætti í Borgarfirðinum á öfugum vegarhelmingi að taka fram úr 4 bílum í blindbeygju, hafi ekki misst af viðburðinum sem hann virtist vera að missa af.
Hann þarf ekki að hafa áhyggjur af mér og börnunum mínum (2 og 4 ára) en við þurftum að víkja fyrir honum út af og niður af veginum um leið og hann kom út úr beygjunni. Sjálfur var ég á ca 90 km hraða.“
Sigurður segir að maðurinn þurfi ekki að hafa áhyggjur af fjölskyldunni sinni. Það hafi þó ekki verið manninum að þakka að eiginkona sigurðar hafi endað sem „barnslaus ekkja“ eftir atvikið.
„Hann þarf ekki að hafa áhyggjur af því að róa börnin mín eftir að við staðnæmdumst utan vegar, því ég gerði það þegar mest af sjokkinu hafði gengið yfir.
Hann þarf heldur ekki að hafa áhyggjur af bílnum þar sem svo ótrúlega vill til að þar sem við hentumst útaf var aðeins malarruðningur en ekki skurður, tré eða stórir steinar.
Aðilinn má hins vegar vita að það er ekki honum að þakka að kona mín endaði daginn ekki sem barnslaus ekkja.“
Hann segist vonast til þess að ástæðan fyrir því að maðurinn hafi keyrt eins og hann keyrði hafi verið góð, svo góð að fórna mætti heillri sfjölskyldur fyrir hana. Þa´segist hann vonast til þess að lögreglan hafi tekist að taka bílstjórann úr umferð.
„Ég vona að ástæða þess að þú ókst eins og þú ókst hafi verið það góð að það mátti fórna einni fjölskyldu fyrir hana.
Vona hins vegar enn frekar að lögreglan (sem ég heyrði í) hafi haft tækifæri og ástæðu til að taka þig úr umferð áður en þú skaðar einhvern.
Kveðja, einn sem er enn að ná sér.”
