„Kæru flugmenn, í dag höfum við breytt A-hluta rekstrarhandbókar. Breyting þessi tekur til hæfniskrafa áhafnameðlima í farþegarými.“
Svona hefst póstur sem sendur hefur verið til allra flugmanna Icelandair, líka þeirra sem sagt hafði verið upp fyrr í ár. Pósturinn, sem er á ensku, var sendur í dag. Þar segir að rekstrarhandbók flugfélagsins hafi verið breytt svo að flugmenn geti tekið við störfum flugfreyja í farþegarými Icelandair á næstu dögum. „Þetta er nauðsynleg aðgerð til þess að tryggja flugáætlun félagsins næstu daga þar til varanleg lausn hefur verið fundin. Flugmenn á bakvakt geta því verið kallaðir til að ljúka þjálfun til að sinna störfum í farþegarými á næstu dögum og í framhaldinu að starfa sem áhafnameðlimur í farþegarými [e. cabin crew].
Icelandair biður í póstinum flugmenn um að láta vita hvort þeir hafi áhuga á að taka þetta starf að sér með því að senda póst á flugfélagið.
„Í ljósi viðkvæmna aðstæðna í samningaviðræðum milli Icelandir og flugfreyja félagsins, og tilkynningarinnar í dag, þurfa allir að vera mjög meðvitaðir [e. on high alert], um að tryggja góðan vinnuanda um borð í flugvélum félagsins, þrátt fyrir skiptar skoðanir. Þetta er nauðsynlegt til að tryggja öryggi í flugrekstri félagsins. Við biðjum alla flugstjóra um að gera þetta að umfjöllunarefni í samtali sínu við áhafnir sínar fyrir flug,“ segir jafnframt í póstinum.
Ljóst er að flugmenn munu fljúga með flugfreyjum félagsins í flugum dagsins í dag og næstu tvo daga.
Icelandair tilkynnti fyrr í dag að þeir hyggðust nota „öryggisfulltrúa“ í stað flugfreyja umborð í flugvélum sínum frá og með mánudeginum 20. júlí. Ljóst er á póstinum að flugfélagið hyggst ráða flugmenn í stöður öryggisfulltrúa en flugfreyjur munu fljúga í dag og næstu tvo daga.
