Landsréttur felldi í dag úrskurð Héraðsdóms úr gildi um að Sigrún Jóhannsdóttir fái ekki að vera réttargæslumaður fjögurra kvenna í nauðgunarmáli gegn Jóhannesi Tryggva Sveinbjörnssyni, sem nefndur hefur verið Stjörnunuddarinn. Ennfremur felldi Landsréttur úr gildi ákvörðun Héraðsdóms Reykjaness um að Jóhannes S. Ólafsson fái ekki að sinna réttargæslu brotaþola í málinu. Jóhannes er sambýlismaður Sigrúnar.
Sigrún var lögmaður kvennanna sem stigu fram og ásökuðu Jóhannes um kynferðisbrot á fyrstu stigum málsins. Allt í allt stigu 32 konur fram, 15 konur lögðu fram kæru í málinu en 11 voru felldar niður í meðferð málsins hjá lögreglu. Hinar fjórar ákærurnar voru þingfestar í Héraðsdómi í síðustu viku. Er Jóhannes þar ákærður fyrir að nauðga fjórum konum.
Sigrún var eins og fyrr segir réttargæslumaður kvennanna fjögurra þar til verjandi Jóhannesar, Steinbergur Finnbogason, setti hana á vitnalista sinn í málinu. Úrskurðaði dómstóllinn þá að Sigrún uppfyllti ekki lengur skilyrði til að vera áfram réttargæslumaður. Landsréttur hefur nú úrskurðað að Sigrún skuli áfram bera vitni í málinu en skipaði jafnframt héraðsdómara að skera úr um það sérstaklega hvort hún fái að halda stöðu sinni sem réttargæslumaður brotaþola í málinu.
Ákvörðun dómara Héraðsdóms um að afturkalla skipun Jóhannesar var felld úr gildi og fær hann því að halda áfram sem réttargæslumaður eins brotaþola í málinu. Afturköllunin var gerð á þeim grundvelli að hann væri sambýlismaður Sigrúnar, sem þá var orðin vitni í málinu og hagsmunir hans því ósamrýmanlegir hagsmuna brotaþola. Á þetta félst Landsréttur ekki og felldi þann úrskurð úr gildi, líkt og fyrr sagði.
Staða Sigrúnar sem réttargæslumaður verður því tekin fyrir af Héraðsdómi og mun hann úrskurða sérstaklega um það áður en aðalmeðferð málsins fer fram. Málaferlin fara fram fyrir luktum dyrum í lokuðu þinghaldi og mega því aðilar máls ekki tjá sig um málið.