Mikil ólga er á meðal foreldra í Grindavík eftir að Guðmunda Þorsteinsdóttir birti á Facebook-síðu sinni myndband sem sýnir hrottafullt ofbeldi meðal unglinga sem átti sér stað í september í fyrra. Guðmunda birti myndbandið sem hluta af færslu um ofbeldi og einelti sem hún segir son sinn hafa orðið fyrir og hefur leitt til þess að fjölskyldan ætlar að flytja frá Grindavík, að hennar sögn.

Sjá einnig: Fjölskylda flýr hrottafullt ofbeldi í Grindavík

DV hefur fengið ábendingu þess efnis að það sé ekki sonur Guðmundu sem verði fyrir ofbeldi á myndbandinu. DV bar þetta undir Guðmundu sem segir að þolandinn í myndbandinu sé drengur sem hafi verið í fóstri hjá henni síðasta haust. Ofbeldi tiltekinna unglingahópa í Grindavík beinist gegn fleirum en syni hennar:

„Lögreglan er með þetta vídeó og ég var búin að kæra þetta. Það var síðan ráðist var á son minn í janúar og hann barinn af fjórum strákum, kom nefbrotinn og alblóðugur heim, og með heilahristing.“

Hún segir einnig að 20 unglingar hafi safnast saman og barið dreng á lóðinni fyrir utan heimili hennar fyrir einni og hálfri viku.