Um sjötíu þúsund landsmenn hafa nú þegar sótt ferðagjöf ríkisins og um tuttugu þúsund hafa nýtt sér hana. Rúmlega fjögur þúsund fyrirtæki hafa skráð sig til að taka við ávísuninni. Gjöfin er liður í að styðja við bakið á íslenskri ferðaþjónustu sem hefur farið illa út úr heimsfaraldri kórónuveirunnar.

Fréttablaðið skýrir frá þessu. Allir landsmenn, átján ára og eldri, eiga rétt á gjöfinni sem er fimm þúsund króna gjafabréf. Fréttablaðið segir að samkvæmt upplýsingum frá stjórnvöldum noti  nú þúsund til fimmtán hundruð manns gjöfina á hverjum degi.

Haft er eftir Vigdísi Jóhannsdóttur, markaðsstjóra verkefnastofu um Stafrænt Ísland, að ánægjulegt sé að sjá hversu jafnt notkun ferðagjafarinnar dreifist á svið innan ferðaþjónustu. 29,7%, þeirra sem hafa nýtt sér gjöfina, keyptu veitingar, 32,7% keyptu gistingu, 28,4% keyptu afþreyingu og 9,2% notuð hana til að greiða fyrir samgöngur.

Haft er eftir Vigdísi að verkefnið hafi farið mjög vel af stað og nú séu ferðaþyngstu mánuðirnir, júlí og ágúst, fram undan.