Fréttablaðið skýrir frá þessu í dag. Haft er eftri Ásdísi Ósk Valsdóttur, fasteignasala hjá Húsaskjóli, að nú sé eftirspurnin þess eðlis að gott sé fyrir kaupendur að vera búnir að fara í greiðslumat og fá verðmat á núverandi eign áður en þeir gera tilboð. Lágir vextir á íbúðalánum eru að hennar mati hugsanlega ein af skýringunum á hversu margir eru að kaupa sína fyrstu eign.
„Fyrstu kaupendur eru yfirleitt mjög traustir, þeir eru búnir að fara í greiðslumat og vita nákvæmlega hvað þeir geta greitt.“
Er haft eftir henni.
Rúmlega 500 fasteignir seldust í apríl sem er rúmlega 29% samdráttur frá apríl á síðasta ári. Ekki liggja fyrir tölur fyrir maí. Í Reykjavík var samdrátturinn 43% á milli ára og 40% á milli mánaða samkvæmt tölum frá Two Birds sem sérhæfir sig í gögnum um fasteignamarkaðinn. Í Kópavogi var samdrátturinn um 19% en í Garðabæ jókst sala fasteigna um 60% á milli ára og um 5% í Hafnarfirði. Söluverð fasteigna lækkaði um 2,6% í Reykjavík en hækkaði í Kópavogi og Garðabæ.
„Viðspyrnan á fasteignamarkaðnum eftir faraldurinn er mun hraðari en ég átti von á, það mun þó líða einhver tími þangað til við sjáum hversu hröð hún verður.“
Hefur Fréttablaðið eftir Páli Heiðari Pálssyni fasteignasala.