Ákveðið hefur verið að fresta tveimur leikjum hjá Fylki í efstu deild kvenna samkvæmt tilkynningu á heimsíðu KSÍ. Upp kom Covid-19 smit í herbúðum Árbæjarliðsins og er því allt liðið í sóttkví.

Fylkiskonur áttu að fara norður á morgun og spila við Þór/KA. Þann 6. júlí átti Fylkir að taka á móti ÍBV. Báðum leikjunum hefur verið frestað en nýir leikdagar hafa ekki verið staðfestir.

Fylkir er sem stendur í þriðja sæti með sjö stig og hefur verið á góðri siglingu. Næsti leikur Fylkis verður þann 15. júlí þegar þær fara í heimsókn á Hlíðarenda og spila við ríkjandi Íslandsmeistara Vals.