Tíu ökumenn voru kærðir fyrir of hraðan akstur á Kringlumýrarbraut um Fossvog í gærkvöldi. Einn þeirra reyndist vera sviptur ökuréttindum og er auk þess grunaður um ölvun við akstur.
Fjórir ökumenn voru kærðir fyrir of hraðan akstur í Ártúnsbrekku í gærkvöldi og nótt. Einnig var akstur 16 ára stúlku stöðvaður í Ártúnsbrekku en hún var á rúntinum með vinkonu sinni. Málið var unnið með aðkomu foreldra og barnaverndaryfirvalda.
Tveir ökumenn voru handteknir í nótt. Annar er grunaður um ölvun við akstur og hinn um að vera undir áhrifum fíkniefna.
Síðdegis í gær rann mannlaus bifreið aftur á bak, í gegnum bílskúrsdyr nágranna og inn í bílskúr. Nokkuð eignatjón hlaust af.
