„Það er búið að vera erfitt fyrir okkur í fjölskyldunni að þurfa að kveðja mömmu í þessum sturluðu aðstæðum og geta ekki verið hjá henni síðasta spölinn nema stutta stund í einu en starfsfólkið á A6 hefur gert allt sem í þeirra valdi stendur og rúmlega það til að gera þetta bærilegra þrátt fyrir að klárlega hafi það aukið álagið á deildinni sem er gríðarlegt fyrir,“

Líkt og greint var frá áðan þá lést sjöundi einstaklingurinn úr COVID-19 sjúkdómnum í gær. Um var að ræða hinu 81 árs gömlu Önnulísu Jansen sem hafði barist fyrir lífi sínu á í þrjár vikur á Landsspítalanum. Fréttablaðið greinir frá þessu og birtir jafnframt viðtal við barn og barnabarn Önnulísu.

„Amma varð tæplega 81 árs. Hún var dagmamma í fjölda ára og endaði svo starfsævi sína á leikskóla, endalaust barngóð og ljúf og góð,“

„Ég var heppin og bjó í næsta húsi við þau afa frá níu ára aldri og naut þess að líta við eftir skóla langt fram á unglingsár, fá kaffitíma, hjálpa til með dagmömmubörnin, spjalla og jafnvel spila smá Nintendo með ömmu. Ég er endalaust þakklát fyrir tímann með henni og fyrir að börnin mín fengið tækifæri til að kynnast yndislegu langömmu sinni,“

Einnig greinir Fréttablaðið frá því að ættingjar Önnulísu hafi verið einstaklega þakklátir fyrir heilbrigðisstarfsfólkið, eða „englarnir“ á deild A6, þar sem hún lá.

„Þau sinntu henni af einstakri hlýju, horfðu með henni á snöpp sem við sendum til hennar og hjálpuðu henni að hringja eitt óvænt stórfjölskyldumyndsímtal áður en henni fór að versna“

Um tíma leit út fyrir að Önnulísu myndi batna, jafnvel var talað um að hún myndi útskrifast, en seinustu helgi fékk Annalisa hjartaáfall og versnaði hún við það. Við tók líknandi meðferð.

„Nú þegar ég sit hér heima með kveikt á kerti fyrir hana og borða kruður að dönskum sið eins og mamma gerði hvern einasta dag birtast alls konar minningabrot úr æsku sem ylja strax og munu gera áfram,“

„Mamma helgaði líf sitt börnum og vissi fátt betra en að hafa barnahóp í kringum sig. Pabbi var sjómaður og oft lengi í burtu þannig að hún sá að miklu leyti ein um uppeldið á okkur systkinunum og við vorum alltaf í fyrsta sæti hjá henni, þá og alla tíð.“

Þá lýsir barn Önnulisu þeim erfiðu aðstæðum sem blasa við aðstandendum þeirra sem látast úr COVID-19. Hún segist nú átta sig betur á þeim gríðarlega erfiðu aðstæðum sem heilbrigðisstarfsfólk er í. Þá lýsir hún samskiptum ættingjanna við Önnulísu í gegnum samfélagsmiðla, en hún sagði ómetanlegt að hafa fengið að kveðja hana.

„Ég vona heitt og innilega að sem fæstir aðstandendur þurfi að kveðja sína nánustu við þessar aðstæður. Við þurftum að sjálfsögðu að vera í fullum hlífðarbúningi eins og starfsfólkið og það var erfiðara og mun óþægilegra en ég hefði nokkurn tímann getað ímyndað mér og mjög streituvaldandi. Ég átta mig nú mun betur á aðstæðunum sem starfsfólkið vinnur við allan sólarhringinn og sendi því mínar hlýjustu kveðjur og þakklæti. Nútímatæknin gerði það að verkum að við náðum að halda fjarsambandi sem ég veit að gladdi mömmu mikið.“

„Á kvöldin var Snapchat skoðað með henni en við vorum dugleg í fjölskyldunni að senda henni kveðjur á þann hátt. Eitt kvöldið fengum við facebook myndspjall og gátum séð mömmu og spjallað við hana í góða stund. Í gærkvöldi fékk ég að kveðja mömmu í gegnum facebook myndspjall og var það mér ómetanlegt Við fjölskyldan erum starfsfólki A6 gríðarlega þakklát og vitum að elsku mamma var þar í góðum og hlýjum höndum,“