Nokkur bjartsýnn tónn var í Þórólfi Guðnasyni sóttvarnalækni á daglegum upplýsingafundi um COVID-19 í dag. „Þessum faraldri gæti verið lokið í maí,“ sagði Þórólfur en hann álítur að við séum tæplega hálfnuð í ferlinu. „Það eru fjórar vikur frá fyrsta tilfellinu og við erum tæplega hálfnuð í langhlaupinu. Faraldurinn er enn í vexti en þetta er ekki hraður vöxtur,,“ sagði Þórólfur.

Áttatíu og átta ný smit hafa greinst frá því í gær eða 20% af þeim sýnum sem veirufræðideildin tók en hlutfallið í sýnatöku Íslenskrar erfðagreiningar var aðeins 1%.

Rúmlega helmingur af þeim sem greindust í gær höfðu verið í sóttkví. Rúmlega tíu þúsund manns eru nú í sóttkví sem gera 3% af þjóðinni.

Þórólfur tilkynnti líka að „pinnamálinu“ væri lokið og enginn skortur væri lengur á sýnatökupinnum.