„Við getum sagt að 99 prósent af markaðinum fyrir ferskan fisk sé lokaður. Við höfum verið að bregðast við þessu með því að vinna í frystar afurðir og dregið úr í sókn í þorsk, sem fór að stórum hluta í ferskar afurðir áður.“
Hefur Fréttablaðið eftir Ægi Pál Friðbertssyni, framkvæmdastjóra Brims, í umfjöllun um málið í dag. Hann sagði einnig að málin séu unnin dag frá degi. Nú hafi breski markaðurinn lokast í viku en það er mjög mikilvægur markaður. Það sama á við um franska markaðinn.
Björgólfur Jóhannsson, forstjóri Samherja, sagði að mikil óvissa sé ríkjandi og miklar breytingar eigi sér stað. Samherji hefur að hans sögn dregið úr veiðum en reynt verði að uppfylla þær þarfir sem eru til staðar, meðal annars með því að sækja í aukategundir og frysta fisk.
Lokun markaða kemur á sama tíma og skipin voru farin að veiða vel eftir erfiðan vetur en tíðarfar hefur verið mjög erfitt í vetur.
„Veturinn er búinn að vera ein ótíð. En veiðin hjá okkur hefur verið ótrúlega góð miðað við það“
Sagði Björgólfur.
