Sautján ára ökumaður varð uppvís að því um helgina að aka um með gult vinnuljós, sem hann hafði útvegað sér, á bifreið sinni. Að auki ók hann glæfralega og skapaði hættu í umferðinni. Lögreglumenn á Suðurnesjum ræddu alvarlega við hann og létu aðstandendur hans vita af tiltækinu.
Þetta kemur fram í skeyti frá lögreglunni á Suðurnesjum.
Þar segir einnig af bifreið sem stöðvuð var um helgina en hún reyndist vera á skráningarnúmerum sem tilheyrðu annarri bifreið. Loks voru átta ökumenn kærðir fyrir hraðakstur og þá var nokkuð um minni háttar umferðaróhöpp.
