Katrín Jakobsdóttir forsætisráðherra sagði fyrr í dag í ávarpi sínu í Vídalínskirkju í Garðabæ að henni hafi verið verulega brugðið þegar hún sá myndband af ofbeldi unglingspilta í sjónvarpsfréttum RÚV á dögunum. Katrín hélt ávarp í kirkjunni í tilefni konudagsins í dag. Hún segir að þjóðin þurfi að styðja betur við börnin sín. RÚV greinir frá þessu.

Hópur unglinga réðst á fjórtán ára dreng með höggum og spörkum í Hamraborginni í síðustu viku. Árásin var tekin upp á myndband en það hefur verið í dreifingu á samfélagsmiðlum. Málið hefur vakið óhug margra.  Faðir drengsins sagði að sonur sinn sé ennþá að jafna sig eftir árásina en hann glímir við hausverk og uppköst vegna hennar. Faðirinn telur að það sé mögulegt að ástæða árásinnar sé útlendingaandúð en hann er af erlendum uppruna. Faðirinn segir árásarmennina vera á aldrinum 15 til 17 ára.

„Eins og okkur öllum þá var mér mjög brugðið í þessari viku að sjá skelfilegt myndband af ungum piltum að berja annan dreng í sjónvarpsfréttum í vikunni […] Hvað rekur ungt fólk til þess að beita aðra slíku ofbeldi, birta af því myndir og dreifa þeim? Við sem erum fullorðin hljótum og verðum að bregðast við slíkum atburðum og koma í veg fyrir þá. Við þurfum að styðja betur við börn og ungmenni, fórnarlömb slíkra atburða, en líka gerendur í slíkum atburðum,“ sagði Katrín.

Hún sagði enn fremur að þó margt væri gott á Íslandi þá þyrfti að taka hart á ofbeldi sem þessu. „Við sem samfélag verðum að tala afdráttarlaust um að við höfnum slíku ofbeldi. Það segir nefnilega margt um samfélag hvernig það býr að börnum sínum. Margt gerum við vel á Íslandi, mikill tekjujöfnuður, góðir skólar, sterkir innviðir og gott heilbrigðiskerfi. En við þurfum líka einmitt að beina athygli okkar að því sem skiptir í raun og veru máli,“ sagði Katrín.