Héraðsdómur Reykjavíkur hefur dæmt ungan mann í tíu mánaða skilorðsbundið fangelsi fyrir hótanir, brot gegn barnaverndarlögum og blygðunarsemisbrot.

Maðurinn var ákærður fyrir að senda 16 ára stúlku hótanir og senda móður hennar fimm nektarmyndir sem sýndu stúlkuna á kynferðislegan hátt. Maðurinn var 16 og 17 ára þegar brotin voru framin.

Ungi maðurinn var ákærður fyrir að hafa að kvöldi miðvikudagsins 2. maí sent stúlkunni meðal annars eftirfarandi skilaboð og móður hennar fyrrnefndar nektarmyndir:

“GET THE FUCK OUT OF YOUR HOUSE BEFORE I COME AND MURDER YOU”

Þá var hann ákærður fyrir að hafa laugardaginn 20. október sent stúlkunni eftirfarandi skilaboð: „you’re dead when im out of here.”

Maðurinn játaði sök fyrir dómi og var hann sakfelldur samkvæmt ákæru. Í dómnum kemur fram að maðurinn glími við geðrænan vanda sem „er þó ekki af þeim toga að leiði að öllu jöfnu til ósakhæfis eða að refsing beri ekki árangur,“ eins og segir í dómnum.

Í dómnum kemur fram að til refsiþyngingar horfi að brot mannsins beindust gegn einstaklingi sem var ungur að árum og þá þótti brotið með meira móti gróft. Til málsbóta var litið til játningar og ungs aldurs hans.

Þá var vitnað til matsgerðar dómskvadds matsmanns þar sem fram kom að full refsing væri ónauðsynleg eða skaðleg. Pilturinn hafi verið vanræktur og líklega aldrei fengið eðlilegt uppeldi fyrr en hann var settur í umsjón meðferðarheimilis. Hann sé nú í sérstöku úrræði á vegum yfirvalda sem virðist hjálpa honum, að mati matsmanns. Mælti matsmeður með því að hann yrði dæmdur til öryggisvistunar í núverandi úrræði.

Af þessum ástæðum þótti rétt að skilorðsbinda refsinguna að öllu leyti. Frestun á fullnustu refsingarinnar var jafnframt bundin því skilyrði að maðurinn sæti umsjón í umræddu úrræði á skilorðstímanum.

Í dómnum kemur fram að stúlkunni hafi verið dæmdar 400 þúsund krónur í miskabætur.