Rauð viðvörun tekur gildi á höfuðborgarsvæðinu klukkan 7. Aðgerðastjórn býst þá við að „aftakaveður“ skelli á. Reiknað er með að verst verði veðrið í efri byggðum höfuðborgarinnar, til dæmis í Grafarvogi, Breiðholti, Kópavogi og Kjalarnesi. Nú þegar hafa mælst yfir 60 m/s í hviðum á Kjalarnesi.

Vísir.is hefur eftir Ágústi Svanssyni, aðalvarðstjóra hjá lögreglunni á höfuðborgarsvæðinu, að slökkvilið, lögregla og björgunarsveitir séu í viðbragðsstöðu. Ágúst stýrir aðgerðarstjórn fyrir höfuðborgarsvæðið. Hann sagði að nú þegar væri farið að bregðast við útköllum og séu verkefni „einna helst að hlaðast upp á Kjalarnesi“. Þar hefur eitt og annað fokið en jafnaðarvindur hefur mælst 24 m/s og hviður allt að 62 m/s.

Búið er að loka öllum helstu leiðum frá höfuðborgarsvæðinu og annast björgunarsveitarmenn gæslu á þeim.