Landsréttur hefur staðfest úrskurð Héraðsdóms fyrir manni sem olli dauða einnar manneskju og slasaði aðra í árekstri á Reykjanesbraut. Hinn ákærði sofnaði undir stýri og missti stjórn á bíl sínum sem fór yfir á rangan vegarhelming með þessum hræðilegu afleiðingum.

Atvikið átti sér stað þann 28. október árið 2018. Maðurinn ók bíl sínum vestur Reykjanesbraut til móts við Bónus Tjarnarvöllum. Var hann ekki fær um að stjórna bílnum örugglega vegna þreytu og sofnaði hann við aksturinn svo að bíllinn fór yfir á akrein fyrir umferð á móti með þeim afleiðingum að árekstur varð við bíl á austurleið eftir Reykjanesbraut. Við áreksturinn lést farþegi í bílnum og ökumaður, sem var ófrísk kona sem gengin var 31 viku á leið, hlaut mar á kviðvegg, blæðingu fyrir fæðingu og tognun og ofreynslu á mjóbak.

Maðurinn reyndist ekki hafa ekið undir áhrifum áfengis eða annarra vímuefna eða lyfja. Maðurinn, sem er pólskur, sagðist ekki muna eftir slysinu en taldi líklegast að það hefði orðið vegna þreytu hans og hafi hann sofnað undir stýri.

Refsingin var 30 daga skilorðsbundið fangelsi. Héraðsdómur svipti manninn ökuréttindum í sex mánuði og felldi Landsréttur þá sviptingu úr gildi. Þá var hann dæmdur til að greiða brotaþola 600 þúsund krónur í miskakostnað og allan málskostnað.

Dóm Landsréttar og héraðsdóms má lesa hér