Stór lögregluaðgerð stóð yfir í raðhúsi við Brekkutanga í Mosfellsbæ í sjötta tímanum í dag. Sjónarvottur sá 10 til 15 lögreglumenn í sóttvarnabúningum fyrir utan húsið. Samkvæmt heimildum úr röðum íbúa í Tanga- og Holtahverfi í Mosfellsbæ er umrætt hús bendlað við innbrota- og almennan þjófnaðarfaraldur sem geisað hefur í Mosfellsbæ undanfarið.
Sjónarvottur sá einn lögreglumann standa vörð við bílskúrsdyr hjá húsinu og bílskúrinn var opinn.
Talið er að íbúar í húsinu séu í fíkniefnaneyslu og einhverjir þeirra eru sagðir Covid-smitaðir. Það hefur ekki fengist staðfest.
DV náði sambandi við Elínu Agnesi Kristínardóttur, aðstoðaryfirlögregluþjón á lögreglustöð 4 hjá Lögreglunni á höfuðborgarsvæðinu í gær. Hún segir lögregluna vera vel meðvitaða um faraldurinn í Mosfellsbæ og hafa safnað miklum upplýsingum. „Þetta er tímabundið ástand og við höfum miklar upplýsingar sem við erum að vinna með. Þetta er ákveðið ástand sem lögreglan er að reyna að koma böndum á. Það er verið að vinna að erfiðum málum sem tengjast þessum tilkynningum sem hafa verið gefnar. Þetta er mjög erfitt ástand en við erum að vinna í þessu og það er eftirlit í gangi i Mosfellsbæ,“ sagði Elín við DV í gær.
Ekki hefur náðst samband við lögreglustöð 4 við vinnslu þessarar fréttar. En eftirfarandi tilkynning barst fá lögreglunni á höfuðborgarsvæðinu vegna málsins:
„Lögreglan á höfuðborgarsvæðinu hefur framkvæmt húsleitir á tveimur stöðum í Mosfellsbæ í dag að undangengnum dómsúrskurðum. Einn hefur verið handtekinn í þessum aðgerðum og lagt var hald á muni, sem grunur leikur á að séu þýfi, á öðrum staðnum. Ekki er hægt að veita frekari upplýsingar um málið að svo stöddu.“
Samkvæmt upplýsingum frá lögreglu er því um annað hús að ræða sem tengist innbrotafaraldrinum fyrir utan það sem hér hefur verið nefnt. Hitt húsið mun vera við götuna Þveholt.
Uppfært kl. 17:30
Samkvæmt tilkynningu í íbúahópi á Facebook fannst mikið þýfi í húsinu við Brekkutanga. Lögreglu hefur beðið íbúa sem sakna muna sem horfið hafa undanfarið að hafa samband á morgun. Meðal þess sem fannst í húsinu voru styttur, blómapottar, reiðhjól, tölvur, Fuzzy-stóll og margt fleira.
