Fyrsta serían hlaut átta tilnefningar til Eddunnar, íslensku kvikmyndaverðlaunanna. Nýja serían verður í boði á Viaplay á Norðurlöndunum og í Eystrasaltslöndunum og Sjónvarpi Símans hér á landi. Það er Sagafilm sem framleiðir þáttaröðina, með stuðningi frá Kvikmyndastöð Íslands og iðnaðar- nýsköpunarráðuneytinu, fyrir Sjónvarp símans og Viaplay.
Þetta kemur fram í tilkynningu, þar segir einnig:
„Snjöll, miskunnarlaus og með smekk fyrir fínu viskíi, kýs reykvíski lögfræðingurinn Stella Blómkvist aðeins eina leið að réttlæti – sína eigin. En eftir því sem tengsl hennar við nokkra af öflugustu stjórnmálamönnum Íslands aukast, stendur Stella frammi fyrir röð flókinna mála sem neyða hana til að nýta einstaka hæfileika sína – og lögin – til hins ýtrasta.
Stella Blómkvist er byggð á samnefndum metsöluskáldsögum og er leikstýrt af Óskari Þór Axelssyni (Svartur á leik) og Þóru Hilmarsdóttur (Brot). Þáttaröðin samanstendur af sex þáttum og er dreift á heimsvísu af Red Arrow Studios International og af Lumière í Benelux-löndunum (Belgíu, Hollandi og Lúxemborg). Fyrsta serían var meðal annars sýnd á streymisveitu AMC Networks, Sundance Now, í Norður-Ameríku, Bretlandi, Ástralíu og Nýja Sjálandi og af NBCUniversal Global á Spáni og á frönskumælandi svæðum.“
