Víðir Reynisson, yfirlögregluþjónn almannavarnadeildar ríkislögreglustjóra, greindi í gær frá aðdraganda þess að hann smitaðist með kórónuveiruna. Smitið hefur vakið töluverða athygli enda þykir ljóst að fyrst Víðir sjálfur, einn af þríeykinu fræga, gat fengið veiruna, þá sé enginn óhultur.
Eftir að Víðir opnaði sig um smitið í gær hefur hann fengið yfir þúsund batakveðjur og mikinn stuðning og á þriðja þúsund hafa brugðist við færslunni hans. Er hann þar hvattur til að skammast sín ekki fyrir smitið og óskað skjótum og góðum bata sem og að margir þakka honum fyrir að hafa staðið í framlínunni allan þennan tíma.
En þó eru einnig þeir sem hafa lýst yfir nokkrum vonbrigðum og telja mögulegt að Víðir hafi kannski ekki hlýtt sjálfum sér sem skyldi. Svo eru að sjálfsögðu þeir sem alltaf sjá húmorinn í lífinu.
Meðal þeirra sem hafa sent honum jákvæðar kveðjur eru Karl Sigurbjönrsson, fyrrverandi biskup, Klara Bjartmarz, framkvæmdastjóri KSÍ og Sigríður Björk Guðjónsdóttir, ríkislögreglustjóri.
Hér má sjá viðbrögð nokkurra á Twitter:
Þannig að sundlaugar og líkamsræktaðstöðvar voru ekki vandamálið heldur gestagangurinn heima hjá Víði?
— Stefán Máni (@Stefan_Mani_) November 29, 2020
Víðir hefur bara eitthvað misskilið sjálfan sig…. pic.twitter.com/IR6ltQOtRo
— Halldór Högurður (@hogurdur) November 28, 2020
Svolítið svekk að ekki einu sinni Víðir hlýðir Víði.
— Snæbjörn (@artybjorn) November 29, 2020
Við eigum að hlýða Víði, en hverjum á Víðir að hlýða? Það hefur alveg gleymst! #viðerumöllalmannavarnir @almannavarnir
— Arnþór Guðmundsson (@ArnthorG) November 29, 2020
Kári reiður, Þórólfur sár, Víðir lasinn og fær stuðningskveðjur og skammir í bland. Skítt með allar pælingar um heimsfaraldur, það sem máli skiptir er þetta drama á Íslandi. Fylgist með í næsta þætti.
— Þorsteinn Guðmunds (@ThorsteinnGud) November 29, 2020
Jæja, Víðir er hættur að fá ættingjana utan af landi í heimsókn og smitum fækkar um helming.
— Þórdís Gísladóttir (@thordisg) November 29, 2020
Plot twist. Hann var að grínast. pic.twitter.com/3gGnTdFmdn
— Sæunn I. Marinós (@saeunnim) November 28, 2020
Ljóst er þó af frásögn Víðis að jafnvel þótt reynt sé til hins ítrasta að fara varlega þá geta hópamyndanir af öllum stærðum orðið uppspretta af smiti. Víðir sagðist að á heimili hans hafi gist vandamaður sem þurfti að sækja sér læknismeðferð og vantað stað til að gista á. Í tengslum við þá heimsókn kom nokkuð af gestum á heimili hans og þrátt fyrir að gæta að tveggja metra reglu þá voru það líklega kaffikannan og bollarnir sem urðu grundvöllur snertismits. Víðir hefur gengist við því að af snertiflötum hafi ekki verið nægilega hugað og það segir manni bara það að aldrei er of varlega farið í þessum faraldri.
