Seðlabankinn tilkynnti nú í morgun að peningastefnunefnd bankans hafi ákveðið að lækka enn frekar vexti bankans, í þetta sinn um 0,25 prósentur. Meginvextir bankans, eða stýrivextir, fara því úr 1% í 0,75%. Þetta eru lægstu stýrivextir bankans á þessari öld.

Í tilkynningu frá bankanum segir að hertar sóttvarnir hafi valdið því að dregið hafi úr viðspyrnu í efnahagslífinu sem hófst í lok sumars og haust og að nú sé gert ráð fyrir 8,5% samdrætti í landsframleiðslu. Það er meiri samdráttur en bankinn hafði spáð í ágúst. Enn fremur spáir bankinn minni hagvexti á næsta ári en áður. „Óvissa um efnahagshorfur er mikil og mun þróun efnahagsmála að töluverðu leyti ráðast af framvindu farsóttarinnar,“ segir í tilkynningunni.

Mánaðarlöng bið er nú eftir þinglýsingum hjá sýslumanninum á höfuðborgarsvæðinu og er sú mikla bið rakin til fjölmargra kaupsamninga, en ekki hefur verið meira um að vera á fasteignamarkaði síðan árið 2013, og til þess að þúsundir nýta nú tækifærið og endurfjármagna fasteignir og bíla sína, enda vextir í sögulegri lægð.

Bæði Íslandsbanki og Landsbankinn hækkuðu vexti á liðnum vikum, og óvíst er hvort að stýrivextir Seðlabankans skili sér í vaxtalækkun viðskiptabankanna, en þeir ráðast af fleiri en bara stýrivöxtum Seðlabankans. Þó hefur Seðlabankinn hvatt banka landsins til þess að fylgja þeirra vaxtalækkunum.