Lögreglan á höfuðborgarsvæðinu hefur sent frá sér tilkynningu vegna máls lögreglukonu sem hefur borið merki er virðast vísa í rasisma á lögreglubúningi sínum. Um er að ræða Vínlandsfánann sem er talinn vera þekkt haturstákn.

Sjá einnig: Merki á búningi íslenskrar lögreglukonu vekur athygli

Í tilkynningu lögreglu segir að hún harmi að hafa valdið fólki særindum með þessu háttalagi og að málið verið tilkynnt til eftirlitsnefndar um störf lögreglu:

„Lögreglan á höfuðborgarsvæðinu vill taka skýrt fram að hún styður ekki með neinum hætti hatursorðræðu eða merki sem ýta undir slíkt. Þetta er nefnt hér vegna umfjöllunar fjölmiðla og myndbirtingar af lögreglumanni fyrr í dag, en á búningi hans mátti sjá merki sem eru óviðeigandi með öllu. Embættið harmar jafnframt mjög að hafa valdið fólki særindum vegna þessa og biður alla hlutaðeigendur innilegrar afsökunar. Skilaboðin sem mátti lesa úr merkjunum eru í engu samræmi við fræðslu, stefnu og markmið lögreglunnar. Lögreglumönnum hjá embættinu hafa enn fremur verið send skýr fyrirmæli um að fjarlægja öll merki af lögreglubúningum sínum, sem ekki eru í samræmi við reglugerð, kunni þau að vera til staðar.

Málið verður tilkynnt til eftirlitsnefndar um störf lögreglu.“