Veggurinn sem hreinsaður var í gær hefur um langa hríð staðið útkrotaður. Um helgina gerðu sér einhverjir leik að því að mála yfir veggjakrotið með svartri málningu og mála svo: „Hvar er nýja stjórnarskráin?“ með hvítum lit á svartan bakgrunn. Á mánudaginn birtust svo menn með háþrýstidælur og hófu að hreinsa skilaboðin af.
Skilaboðin ættu að vera orðin borgarbúum kunn en þau hafa birst víða á síðustu misserum og er bersýnilega um samstillt átak að ræða til þess að vekja athygli á nýrri stjórnarskránni sem samþykkt var af stjórnlagaráði sem skipað var árið 2011. Málið er auðvitað rammpólitískt.
Vinna við hreinsunina stóð enn yfir í morgun þegar blaðamaður DV átti leið hjá. Gera má ráð fyrir að verkið verði klárað í dag, en hreinsunin virðist seinleg í framkvæmd, eins og sjá má á myndbandi DV af hreinsuninni.
Þrátt fyrir mótlætið hefur fólkið á bak við verkið ekki látið stoppa sig og ákvað að byrja í dag að mála skilaboðin á nýjan vegg. 20-30 manns eru nú saman að mála á vegginn en verkið hófst um klukkan þrjú í dag. Blaðamaður DV ræddi við einn málaranna sem sagði að verkinu yrði líklega lokið um klukkan 19 í kvöld.
Málarinn sagði að þarna væri ekki á ferð hluti formlegs félagsskapar, heldur óformlegur samtíningur fólks með þetta sameiginlega málefni í huga. „Þetta ætti að koma öllum við,“ sagði hann. Aðspurður hver ætti þennan vegg, svaraði annar málaranna, „bara sami og á hinn vegginn, við skattgreiðendur.“
