Sextíu ný smit greindust innanlands í gær og hafa þau ekki verið færri síðan á sunnudaginn í síðustu viku. Fjöldi staðfestra smita á Íslandi er þá jafnframt skriðinn yfir 3.500, eða 3.526, nákvæmlega. 2.499 hafa fengið Covid-19 og náð sér. 25 eru á sjúkrahúsi og 3 í gjörgæslu.
Samkvæmt tölum á covid.is eru 3.916 manns í sóttkví, og aðrir 1.666 í skimunarsóttkví.
Þó tölur gærdagsins séu lægri en verið hefur þessa vikuna er óvíst hvort lát sé á hinni svokallaðri þriðju bylgju kórónuveirufaraldursins. Gripið var til mjög hertra aðgerða fyrir um það bil viku síðan og sögðu heilbrigðisyfirvöld við það tækifæri að skoða yrði eftir 1-2 vikur hvort aðgerðirnar væru að skila árangri. Þannig er ljóst að tölurnar næstu daga munu miklu máli skipta þegar taka á ákvörðun um framhald á hertum aðgerðum.
Kári Stefánsson þarf reyndar ekki að bíða eftir næstu dögum, því í útvarpsþættinum á Sprengisandi á Bylgunni í morgun sagðist Kári vera ósáttur við núverandi fyrirkomulag sóttvarnatakmarkana. Sagði Kári að hann hefði sjálfur gengið mun lengra. Kári sagði að prísinn væri vissulega hár á þeim takmörkunum. Hann væri raunar svo hár að væri ekki réttlætanlegt að ganga ekki enn lengra og loka veitingahúsum og skólum. Þannig væri tekin óþarfa áhætta með þá miklu fjárfestingu sem samkomutakmarkanir væru.
Kári sagði jafnframt að ekkert benti til þess að smit hafi borist inn í landið eftir að tvöföld skimun hafi verið tekin upp á landamærunum. Smitin sem nú séu á sveimi séu rekjanleg til ferðamanna sem komu til landsins áður en tvöfalda skimunin var tekin upp. Kári sagði að lokum veiruna þrjóska, en ólíklegt að hún breyti um hegðun.
„Ég held að veiran sé söm við sig, ég held að hún sé þrjósk og sé ekkert að breyta um hegðun. Hins vegar ber að geta að ef hún stökkbreytist á þann hátt að hegðun hennar breytist þá eru yfirgnæfandi líkur á því að hún verði skaðminni en meira smitandi,“ sagði Kári.
