Maður sem ákærður var fyrir blygðunarsemisbrot í Héraðsdómi Reykjavíkur hlaut í dag fjögurra mánaða skilorðsbundið fangelsi. Maðurinn játaði sök. Ákært var fyrir brot gegn blygðunarsemi og stórfelldar ærumeiðingar.
Kemur fram í dómnum að maðurinn hafi á tímabilinu 1.-30. desember sent nýja kærasta fyrrverandi unnustu sinnar ítrekuð skilaboð þar sem konunni er lýst sem óheiðarlegri, hún uppnefnd og sögð hafa veitt hinum ákærða munnmök er hún var í sambandi með nýja kærastanum. Í byrjun desember sendi maðurinn jafnframt kynferðislegt myndskeið af konunni á nýja kærastann. Með athæfi sínu er maðurinn í ákærunni sagður hafa sært blygðunarsemi konunnar, móðgað hana og smánað.
Málið var sótt af Héraðssaksóknara sem gerði þá kröfu að maðurinn yrði gert að sæta refsingu fyrir brot sín og að greiða allan sakarkostnað. Þá krafðist konan tveggja milljóna í miskabætur.
Ákærði játaði skýlaust brot sín fyrir dómi og er gert að sæta fjögurra mánaða fangelsisrefsingar, skilorðsbundið til tveggja ára. Voru konunni dæmar 800.000 krónur í miskabætur. Að lokum er manninum með dómnum gert að greiða um 650.000 krónur í málskostnað og laun verjanda síns.
