Kínverska síðan Made-In-China.com hefur undanfarin misseri auglýst vörur sínar á Facebook á Íslandi. Síðan býður fólki að kaupa gervifíkniefni, verkjalyf og stera í miklu magni.

Fyrrverandi oddviti Pírata á Suðurnesjum, Þórólfur Júlían Dagsson, bendir lögreglu á þetta á Facebook-síðu sinni.

„Það er víst hægt að versla kínverkst kókaín á Facebook, þarf ekki að skoða þetta?“

Mjög margar tegundir af efnum eru til sölu á síðunni. Um er að ræða verkja- og deyfilyf í flestum tilfellum, þó að sum þeirra séu örvandi og hafi svipuð áhrif og kókaín, líkt og efnið dimethocaine. Efnin eru langflest einungis seld í kílóum og sum þeirra er ekki hægt að kaupa nema þau séu keypt í tugum kílóa, en samkvæmt auglýsingunum eru efnin mjög hrein. Hægt er að senda fyrirspurnir á seljendur og ekki virðist vera mikið mál að fá efnin send til Íslands.

Í lögum um ávana- og fíkniefni er listi yfir þau efni sem bönnuð eru hér á landi. Umrædd efni er ekki að finna á listanum og þar af leiðandi á gráu svæði. Efnin eru meira að segja lögleg sumstaðar í heiminum. Samkvæmt heimildum DV er innflutningur þessara efna þó stöðvaður komist upp um að þau séu flutt til landsins. Líklega hefur flutningur á þessum efnum átt sér stað í nokkur skipti, þó ekki í jafn miklu magni og umrædd síða býður upp á.