„Ég ætlaði að ganga á milli og þá rak hann hnífinn í áttina að mér,“ segir Kristín Guðmundsdóttir, móðir Guðmundar Freys Magnússonar, en Guðmundur er grunaður um að hafa myrt kærasta Kristínar, í Torrevieja á Spáni um síðustu helgi.

Staðfestir Kristín þar með frásagnir spænskra fjölmiðla um að Guðmundur verði einnig ákærður fyrir líkamsárás á hana. ‚

„Það er engin ástæða,“ svarar Kristín þeirri spurningu blaðamanns um hver hafi verið ástæðan fyrir voðaverkinu. „Hann var búinn að fara í garða allt í kring og þar voru hundar sem vöktu eigendurna og þegar lögregla og sjúkrabíll voru komin með blikkandi ljósin þá kom það fólk til að sjá mynd af honum sem ég hafði fært lögreglu. Allir staðfestu að þetta væri sami maður. Þannig að það var bara hending hvar hann gæti brotist inn,“ segir Kristín og ljóst samkvæmt hennar frásögn að framferði Guðmundar var eingöngu sprottið af þörf fyrir peninga fyrir skammti af fíkniefnum:

„Hann var bara að reyna að ná sér í eiturlyf. Hann var stútfullur af allskonar eitri sem gerði hann brjálaðan.“

Guðmundur Freyr situr í gæsluvarðhaldi í Torrevieyja vegna málsins og var hann leiddur fyrir dómara í gær, samkvæmt upplýsingum lögreglunnar á Spáni.