„Augljóst er að hugmyndir um að galopna landið og hleypa öllum inn sem hingað vilja koma ganga þvert gegn hagsmunum Íslendinga sem gætu með engu móti tekið á móti þeim fjölda sem hingað
vill koma. Raunsæi verður að ráða för,“ segir í leiðara Morgunblaðsins í dag.

Þar eru gerð að umfjöllunarefni áform Evrópusambandsins um að leggja af hina svonefndu Dyflinnar-reglugerð. Hún felur í sér að aðeins skal taka til meðferðar umsókn um hæli í einu aðildarríkja Evrópusambandsins, auk Íslands og Noregs. Ef hælisleitandi hefur fengið synjun á umsókn um hæli í einu ríki og flýr þaðan í annað ríki, þá geta yfirvöld í því ríki sent hann aftur til landsins þaðan sem hann kom, þ.e. fyrsta örugga landsins sem hann flúði til.

Ursula von de Leyen, framkvæmdastjóri ESB lýsti því yfir á miðvikudag að sambandið hygðist setja nýjar reglur um málefni flóttamanna sem kæmu í staðinn fyrir Dyflinnarreglugerðina og ættu að stuðla að því að dreifa ábyrgð á flóttamannavandanum betur á milli Evrópuríkja en mun meiri flóttamannastraumur er til ríkja sunnarlega í Evrópu en í norðurhlutanum.

Morgunblaðið bendir á að þrátt fyrir Dyflinnarreglugerðina sæki mikill fjöldi fólks hingað til lands í leit að pólitísku hæli. Fólk hafi á undanförnum árum flætt stjórnlaust inn í landið.

Í lok leiðarans segir:

„Arftaki Dyflinnarreglugerðarinnar verður kynntur betur í næstu viku. Ljóst er að það mun skipta íslensk stjórnvöld miklu máli, að þar verði áfram tryggt, að Ísland eigi einhverja möguleika á að verja landamæri sín og ákveða hverjir geta komið hingað og sest að.“