„Í ástarsvikum stofna svikarar til falsks ástarsambands á netinu í þeim tilgangi að hafa fé af fórnarlömbunum. Þeir þykjast t.d. vera ungar konur í vanda eða særðir hermenn til að fá fólk til að bíta á agnið,“ segir í nýrri tilkynningu á vef Landsbankans þar sem varað er við ástarsvikum.

Segir í greininni að tilvikin hér á landi séu 48 frá árinu 2017 en þeim hafi töluvert fjölgað undanfarið. Þá segir að tæplega 60% þolenda þessara glæpa séu karlmenn á sextugs- og sjötugsaldri en konum í þolendahópnum hafi farið fjölgandi undanfarið.

Landsbankinn segir að svikahrapparnir geti verið mjög sannfærandi en þeir leita að fórnarlömbum á samfélagsmiðlum og stefnumótasíðum eða -öppum:

„Það er ekki tilviljun að svikararnir leita fórnarlamba á samfélagsmiðlum, stefnumótasíðum og -öppum. Ástæður þess að fórnarlömb falla í gildruna geta verið ótal margar, til að mynda tilfinningalegt uppnám og sorg eftir sambandsslit eða fráfall maka. Lýsingar svikaranna geta verið afskaplega sannfærandi, þar sem innri og ytri aðstæðum eru gerð ítarleg skil í nákvæmum frásögnum, jafnvel með réttum staðháttalýsingum og vel útfærðu myndefni sem er stolið héðan og þaðan af netinu. Þegar nýja ástin ytra byrjar svo af mikilli einlægni að lýsa sárri reynslu í sínum einka- og heimahögum, eru fyrstu viðbrögð fórnarlambsins gjarnan þau að rétta fram hjálparhönd.“