Fréttablaðið skýrir frá þessu í dag. Starf framhaldsskóla á að hefjast upp úr miðjum mánuði en starf grunnskólanna hefst um viku síðar. Blaðið hefur eftir Magnúsi Ingvasyni, skólameistara Fjölbrautaskólans við Ármúla, að kennarar séu nú að undirbúa önnina, hvort sem um stað- eða fjarkennslu verði að ræða.
„Við bíðum aðeins eftir því hvernig mál þróast, en ég hef látið kennara vita að mögulega verði byrjað á fjarkennslu.“
Sagði hann.
Ingi Ólafsson, skólastjóri Verzlunarskólans, sagði að verið sé að teikna upp sviðsmyndir sem taki mið af skilaboðum almannavarna um fjölda í hverju rými og hvort tveggja metra reglan verði í gildi.
„Ef ekki verður hægt að hefja kennslu með hefðbundnum hætti, þá verður farið í fjarkennslu með svipuðu sniði og á síðustu önn.“
Er haft eftir honum.
Sigrún Björnsdóttir, upplýsingafulltrúi skóla- og frístundasviðs Reykjavíkurborgar, sagði að unnið væri að skipulagningu grunnskólastarfsins í samvinnu við stjórnendur. Meginmarkmiðið sé að tryggja að hægt verði að halda óbreyttu starfi fyrir börn og unglinga.
„Í því samhengi verður höfuðáherslan lögð á smitgát milli starfsfólks í daglegu starfi og milli foreldra og starfsfólks.“
Þetta á að hennar sögn til dæmis við um aðgengi að sameiginlegum skóla- og frístundarýmum.
