Facebook-færsla sem ung kona birti skömmu eftir síðustu helgi hefur vakið töluverða athygli. Þar rekur hún atvik sem varð um helgina er hún og unnusta hennar komu að ósjálfbjarga manni við Barónsstíg. Maðurinn sat á gangstéttinni og kastaði upp. Parinu fannst erfitt að greina hvort ástand mannsins stafaði af drykkju eða veikindum en í öllu falli virtist hann þarfnast hjálpar.

Konan hringdi í neyðarlínuna og þar var henni gefið samband við fjarskiptamiðstöð lögreglustjóra. Henni þóttu viðbrögðin lýsa áhugaleysi og látið að því liggja að ekki þyrfti að sinna manninum ef hann væri bara drukkinn. Konan segir í færslunni að henni þyki ekki ganga að skilja fólk eftir ósjálfbarga úti á götu, hver sem ástæðan fyrir því sé.  Hins vegar komu nokkru síðar ungir lögreglumenn á vettvang sem sinntu manninum en kærðu sig ekki um upplýsingar frá konunni. Segist hún ekki vita hvernig málinu lyktaði.

Tilefni færslunnar er hins vegar það að konan fullyrðir að lögreglumaðurinn sem hún ræddi við í síma hafi spurt hana hvort viðkomandi maður liti út fyrir að vera „skattborgari“. Hún spurði ekki nánar út í hvað hann meinti með því en mögulegar merkingar eru þær að lögreglumaðurinn hafi átt við hvort maðurinn væri utangarðsmaður, erlendur ferðamaður eða hælisleitandi.

RÚV hafði samband við upplýsingafulltrúa ríkislögreglustjóra vegna málsins sem staðfesti að málið sé til skoðunar hjá embættinu. Sagði hann ekki tímabært að tjá sig um meint orðfæri lögreglumannsins fyrr en búið væri að hlusta á upptöku af samtalinu og skoða málið í heild.