Samkvæmt frumvarpi til nýrra laga um fjarskipti getur samgöngu- og sveitarstjórnarráðherra takmarkað starfsemi Huawei hér á landi með reglugerð. Frumvarpið verður tekið til afgreiðslu í haust. Í því er tekið á öryggishagsmunum Íslands í uppbyggingu 5G netkerfa.

Fréttablaðið skýrir frá þessu. Fram kemur að frumvarpið sé í samræmi við fordæmi Evrópuríkja í öryggismálum og sé ætlað að tryggja að 5G-kerfin verði ekki of háð Huawei eða öðrum framleiðendum tæknibúnaðar.

Í greinargerð með frumvarpinu kemur fram að 87. grein  þess veiti samgönguráðherra heimild til að setja reglugerð um „að búnaður í tilteknum hlutum innlendra farneta, sem teljast viðkvæmir með tilliti til almannahagsmuna og öryggis ríkisins, skuli í heild sinni eða í ákveðnum hlutfalli, vera frá framleiðanda í ríki sem Ísland á í öryggissamstarfi við, eða ríki innan Evrópska efnahagssvæðisins.“

Þannig getur ráðherra bannað búnað frá Huawei af öryggisástæðum í hluta af farnetum landsins.