Snemma í mánuðinum greindi DV frá því að Margra áratuga gamlir ættarskartgripir hefðu horfið úr gullsmíðaverkstæðinu Gullkistan. Málið vakti athygli en fyrrverandi starfsmaður var ásakaður um að hafa stolið gripunum auk annara verðmæta, sem metið var á margar milljónir. Þessi fyrrverandi starfsmaður á þá að hafa kennt nánast níræðum eiganda verkstæðisins, Dóru Jónsdóttur um, taldi að hún væri farin að týna hlutum vegna aldurs.

SJÁ EINNIG: Uppnám í Gullkistunni – Starfsmaður grunaður um rán á skartgripum upp á margar milljónir

Þetta mál hefur nú fengið farsælan endi. Frá því greinir Ragnheiður Jónína Sverrisdóttir á Facebook-síðu sinni. Umræddir gullskartgripir eru í eigu dóttur hennar, Söru.

Skartgripunum var komið í viðgerð fyrir fyrirhugaða útskrift Söru úr Háskóla íslands. Gripirnir fóru til Gullkistunnar í febrúar, en síðan höfðu þeir ekki sést. Það breytist hins vegar í gær.

„Jæja undur og stórmerki svona daginn fyrir útskrift Söru. Ég bað gullsmiðinn um að lána Söru eitthvað hálsmen fyrir útskriftina á morgun. Það var ekki nema sjálfsagt sagði hún, en svo var Sara bara svo önnum kafin við að baka og sagðist ekki ná því en Dóra vildi endilega fá hana á staðinn. Hún ætlaði að koma henni á óvart en varð að segja henni tilefnið til að fá hana. Sara var ekki lengi að slökkva á ofninum og við hentumst af stað. Það var mikil gleði í litlu búðinni. Skartgripirnir eru fundnir hvernig og hvar sem þeir voru við spurðum ekki að því, það nægir að þeir eru fundnir og skínandi vel við gerðir og pússaðir Klárlega besta útskriftargjöfin. Ótrúleg tímasetning“

Í dag fer umrædd útskrift Söru fram, en líkt og Ragnheiður segir þá mun dóttir hennar bera gullgripina þrátt fyrir allt sem kom upp á.