Mikil viðbúnaður er vegna alelda húss á horni Vesturgötu og Bræðraborgarstígs. Þrír íbúar kjallaraíbúðarinnar voru handteknir í húsinu við aðgerðir lögreglu og hafa fjórir verið fluttir á spítala. Allt tiltækt slökkvilið höfuðborgarsvæðisins hefur verið kallað út auk lögreglu og sérsveitar. Slökkviliðið er enn að reyna að ráða niðurlögum eldsins.

Verið er að vökva nærliggjandi timburhús til að forða því frá eldi. Búið er að rýma timburhúsið.

Lögreglan hefur lýst því yfir á staðnum að sprengjuhætta sé í húsinu og biður fólk að vera ekki of nálægt húsinu. Einnig er mælst til þess að fólk loki gluggum til að forðast reyk.

Uppfært kl. 16:33

Jón Viðar Matthíasson, slökkviliðsstjóri, er mættur á svæðið. Í samtali við blaðamann DV segir hann að þeir handteknu hafi verið teknir höndum því þeir fóru inn í brennandi húsið til að bjarga verðmætum.

„Þeir voru handteknir til að ná stjórn á vettvangi. Við urðum að grípa til þessa öryggisráðstafana,“ segir hann.

Hann segir að fólki hafi verið bjargað út um glugga með stiga og einhverjir hafi komist út sjálfir. Honum er ekki kunnugt um líðan þeirra sem eru á sjúkrahúsi.

Milligólf eru að gefa sig, auk stiga upp á ris.  Að sögn Jóns Viðars er því verkefnið nú að slökkva eldinn utan frá. Ekki er vitað um eldsupptök.