Þórólfur Guðnason sóttvarnalæknir telur að um 1% þjóðarinnar hafi sýkst af kórónuveirunni. Það mat er hins vegar nokkurri óvissu háð. Þetta þýði hins vegar að mjög stór hluti þjóðarinnar er móttækilegur fyrir smiti og því er mikilvægt að viðhalda takmörkunum og sýna varúð. Þetta kom fram á upplýsingafundi dagsins.

Enginn greindist með smit síðasta sólarhring og er það í fyrsta skipti síðan faraldurinn hófst hér á landi. „Við leggjum ekki djúpa merkingu í töluna núll núna,“ sagði Þórólfur. Benti hann á að sveiflur væru milli daga og auk þess hefðu fá sýni verið greind, 175 hjá veirufræðideildinni og 15 hjá Íslenskri erfðagreiningu.

Aðgerðir varðandi sóttkví ferðmanna taka gildi í dag og eru í gildi til 15. maí. Til skoðunar er hve víðtækt þetta þurfi að vera og til hve langs tíma. Ýmsar útfærslur eru í skoðun um hvernig þetta getur orðið áfram. Aðgerðirnar fela í sér að allir sem koma til landsins þurfa að vera í sóttkví í tvær vikur.